Bagong breed ng stars: Mr. and Ms. Chinatown Global Philippines winners, magkakaroon ng sariling microdramas
Hindi lang korona at sash ang nakuha nina Maria Yna Angela Uy at Benedict Siao sa katatapos lang na Mr. and Ms. Chinatown Global Philippines. Dahil sa partnership ng Chinoy TV at Star Magic, magkakaroon ang mga winners ng sariling “microdramas” na ipapalabas internationally sa vertical format.
Sinasabayan nito ang trend ng mga vertical series na sikat na sikat ngayon sa mga mobile phone users. Ginamit ang “Star Hunt” nationwide search platform para mangalap ng candidates sa Metro Manila, Cebu, Davao, at Baguio. Sa huli, 26 aspirants ang naglaban-laban sa male at female divisions.
Ang gabi ng pagtatapos
Naganap ang “Winners’ Night” noong Martes ng gabi, October 20, sa Manila Metropolitan Theater. Dito kinoronahan si Maria Yna Angela Uy mula Quezon City at si Benedict Siao mula Manila bilang mga panalo. Kitang-kita ang seryosong paghahanap ng susunod na entertainment darlings dahil mismong si Laurenti Dyogi, ang Head ng Star Magic, ang nakaupo sa judging panel.
Sa opening production number pa lang, pinakita na ng mga contestants ang kanilang talent kung saan ang iba ay kumanta live habang ang iba naman ay sumayaw. Sila ang ituturing na next generation ng Chinese-Filipino entertainment stars.
Road to Global
Bukod sa pag-star sa microdramas na gagawin ng ABS CBN Studios, may mas malaki pang misyon ang dalawa. Sila ang magre-represent sa Pilipinas sa third edition ng Mr. and Ms. Chinatown Global pageant na gaganapin sa Cebu City sa February sa susunod na taon.
Hindi na bago ang international competitions para kay Uy dahil siya ang 2025 Supermodel Universe winner. Susubukan niyang makuha ang pangalawang panalo para sa Pilipinas sa female division, matapos itong makuha ni Khryss Go sa first edition ng global tilt. Si Siao naman ang magsusumikap na maging kauna-unahang Filipino contender na mananalo sa male title.
Kasama rin sa winners’ circle sina Jyron Ngo ng Binondo, Manila, at Izobel Uy ng Cebu City bilang first runners-up. Sumunod naman sina Jay Chan II ng Cebu City at Jamaica Co ng Pasig City bilang second runners-up.
Sana all may microdrama, 'no? Kayo, handa na ba kayong mag-scroll sa mga bagong Chinoy stars natin?