Makaronosalata me pulë: Bëj pushim nga ushqimi i shpejtë, pa shumë mundim!

A je duke kërkuar një vakt që përgatitet shpejt, të ngop dhe mund ta marrësh me vete kudo? Atëherë makaronosalata me pulë është zgjidhja! Kjo recetë është kombinimi perfekt i karbohidrateve, proteinave dhe perimeve në një pjatë, dhe më e mira, mund ta përshtatësh me çfarë të kesh në frigorifer.

Sekreti për një version më të balancuar? Mos u fikso vetëm te makaronat dhe salca. Shto shumë perime, mish pule të bardhë dhe një salcë të thjeshtë me vaj ulliri e limon, dhe ke një vakt super të shijshëm që të ndihmon të ushqehesh mirë . S'është aspak e komplikuar, por është garanci për shije të freskët dhe energji!

Makaronosalata me pulë

Përbërësit (për 2-3 racione)

• 250 gr makarona, preferohen integrale

• 250 gr fileto pule

• 1 kastravec

• 1 domate

• 1 spec

• ½ qepë

• 50 gr misër

• 50 gr djathë feta

• 1 grusht i vogël majdanoz ose kopër

• 1-2 lugë gjelle vaj ulliri

• Lëngu i 1 limoni

• 1 lugë çaji mustardë

• Kripë

• Piper

• Rigoni

Përgatitja

• Filloni duke zier makaronat sipas udhëzimeve të paketimit. Lërini pak "al dente",. Sapo të jenë gati, kullojini dhe lërini të ftohen plotësisht.

• Ndërkohë, piqni pulën në një tigan ngjitës, në furrë ose në "air fryer" derisa të jetë gatuar mirë brenda. Shtoni pak kripë, piper dhe rigon për shije. Lëreni të ftohet për disa minuta dhe më pas priteni në copa të vogla.

• Lani dhe prisni kastravecin, domaten dhe specin. Prisni qepën në feta të holla dhe thërrmojeni djathin feta.

• Në një tas të madh bashkoni makaronat, pulën dhe të gjitha perimet e prera. Shtoni misrin, djathin feta dhe majdanozin ose koprën e grirë imët.

• Për salcën (dressing-un), në një tas të vogël përzieni vajin e ullirit, lëngun e limonit dhe mustardën.

• Hidhni salcën sipër sallatës dhe përzieni butësisht, në mënyrë që të shkojë kudo.

Kjo makaronosalata s'mbështetet te salcat e rënda apo majoneza për të qenë e shijshme, gjë që e bën një opsion super të freskët dhe të lehtë. Pula të jep proteinat e nevojshme, perimet shtojnë fibrat dhe variacionin e ngjyrave (dhe vitaminave, mos harroni!), ndërsa makaronat janë burim karbohidratesh dhe energjie. Dhe vaji i ullirit në salcë të jep yndyrnat e mira pa ndërlikime.

Është aq e thjeshtë saqë mund ta bësh krejt sipas qejfit. Shto domate të vogla, karota, rukola, spinaq apo ullinj, sipas preferencave. Dhe nëse s'do feta, thjesht hiqe ose zëvendësoje me ndonjë djathë tjetër që të pëlqen më shumë. Për një shije akoma më intensive, shto pak spec të kuq pluhur (paprika) ose borzilok të freskët. Më e mira? Mund ta përgatisësh paraprakisht dhe ta ruash në frigorifer, kështu ke gati një vakt të shpejtë për ditën tjetër. Vetëm një "tip" i vogël: nëse e përgatit disa orë para, lër pak salcë mënjanë dhe shtoja pak para se ta servirësh, që sallata të mbetet më freskët.

Ushqimi i shëndetshëm nuk duhet të jetë një mision hapësinor. Balanca, varieteti dhe sasitë që i përshtaten nevojave të tua janë çelësi. Dhe kjo sallatë, siç e shikon, i ka të gjitha! Atëherë, çfarë po pret? Merr një tas dhe fillo!