Brooks Nader i vë flakën Cannes me frymën 'Baywatch', po edhe me ca rrëfime që s'i prisnit!

Brooks Nader, modelja dhe tashmë aktorja, shkëlqeu në Cannes teksa solli frymën e “Baywatch” në prezantimin e serialit të ri të Fox në MIPCOM. Me një fustan të kuq të ngushtë, ajo rikujtoi menjëherë ngjyrën ikonike të kostumeve të banjës të serialit legjendar, duke tërhequr vëmendjen e të gjithëve.

Fustani i saj i gjatë, në stil “bandage”, me dekolte të theksuar dhe mëngë të shkurtra, bëri Nader epiqendrën e Palais des Festivals. Për ta kompletuar look-un, ajo kishte zgjedhur taka të larta të zeza dhe një palë vathë elegantë, ndërsa flokët biondë i kishte lënë të lira në onde, gati-gati si një “Baywatch babe” moderne. Ylli i “Sports Illustrated” pozoi për fotografët në tapetin e kuq, me portin e jugut të Francës në sfond, dhe iu bashkua në event edhe kolegu Stephen Amell, i cili do të luajë kapitenin Hobie Buchannon. Amell ishte veshur me një xhaketë të bardhë, këmishë dhe pantallona të zeza.

Brooks interpreton personazhin Selene në rikthimin modern të serialit që në vitet ’90 e shndërroi Pamela Anderson në një prej simboleve më të njohura të kulturës pop. Roli shënon një hap të rëndësishëm në kalimin e Nader nga modelingu drejt aktrimit, dhe ne mezi presim ta shohim!

Brooks Nader pa Filtra: Rrëfimet që s'i prisnit

Nëse mendoni se Brooks shkëlqen vetëm në tapetin e kuq, gabim! Ajo nuk i fsheh aspak ndërhyrjet estetike, përkundrazi, është super e hapur! Aktorja ka pranuar se ka kryer rinoplastikë, ka përdorur injeksione kozmetike si Botox dhe ka vendosur faseta dentare. Por, ka edhe një gjë për të cilën ajo pendohet…

Brooks ka zbuluar më herët këtë vit se në të kaluarën kishte bërë liposuksion, një vendim për të cilin sot thotë se është penduar. “Kam bërë liposuksion vite më parë dhe do të pendohem gjithmonë, sepse në të vërtetë nuk kisha nevojë,” tha ajo. Madje, sipas Nader, procedura i kishte shkaktuar edhe disa efekte që nuk i kishte dëshiruar, si gropëzime dhe parregullsi, dhe ajo mendon se duhet të bëjmë më pak nga këto gjëra e të përqendrohemi më shumë te shëndeti. Për rinoplastikën, në vitin 2025 ajo kishte bërë shaka me komentet negative që kishte marrë. Dhe jo vetëm kaq, Nader ka treguar edhe se ka përdorur një medikament të klasës GLP-1 si pjesë e përpjekjeve të saj për humbje peshe.

Nga Tate Britain në Rivierën Franceze: Stili i Nader nuk ndalet

Pak ditë përpara se të shfaqej në Cannes, Brooks Nader kishte marrë pjesë në hapjen e ekspozitës “The 90s: Art and Fashion” në Tate Britain. Dhe, siç e do moda e viteve ’90, ajo u shfaq me një minifustan të tejdukshëm me dantellë dhe motive floreale, të kombinuar me taka me majë. Një look totalisht i ndryshëm nga ai i “Baywatch”, por po aq i guximshëm!

Në event ishte e pranishme edhe motra e saj Sarah Jane, ndërsa mes të ftuarve të tjerë të njohur ishin Emma Thynn, Natasha Poly, Damian Hurley dhe Donatella Versace. Ekspozita, e cila bashkon fotografinë, modën, artin dhe dizajnin e një prej dekadave më me ndikim, do të qëndrojë e hapur nga 8 tetori 2026 deri më 14 shkurt 2027. Kështu që, nëse do të jeni aty, mos e humbisni!

Paraqitja e Brooks Nader në Cannes vjen ndërsa Fox po prezanton versionin e ri të “Baywatch” para tregut ndërkombëtar televiziv. Seriali origjinal u bë fenomen global gjatë viteve ’90, ndërsa kostumet e kuqe të rojave të plazhit u shndërruan në një prej imazheve më të njohura të televizionit të asaj periudhe. Me fustanin e saj të kuq në MIPCOM, Nader i bëri një referencë të drejtpërdrejtë kësaj trashëgimie, ndërsa rikthimi i “Baywatch” synon të sjellë formulën e famshme të serialit te një brez i ri shikuesish.

Po mirë, po ju, kujt i ka marrë malli për 'Baywatch'-in e vjetër? Se ne po!