A ke insomni? Këto 6 ushqime janë si një ‘përqafim’ para gjumit!

Insomnia është bërë si shoku ynë i bezdisshëm, sidomos kur stresi, orët e gjata para ekranit dhe ritmet e çmendura nuk na lënë të relaksohemi. Po, e dimë që një rutinë e mirë gjumi bën magji, por çfarë po sikur të themi se edhe ushqimet kanë një fjalë të madhe këtu? Ushqimet që zgjedhim para gjumit mund të ndikojnë shumë në sa shpejt do të zëmë gjumin. Ato që janë plot me magnez, triptofan dhe yndyra të mira, mund të ndihmojnë trupin të funksionojë si orë dhe të na dhurojnë një natë më të qetë. S'ka ushqim 'magjik' që zhduk insomninë, por ndryshime të vogla bëjnë diferencën e madhe!

Nëse po kërkon një mënyrë më natyrale për të fjetur më mirë, pse të mos e fillosh nga kuzhina? Nga një frut i thjeshtë, deri te një snack i shpejtë, opsione ka plot dhe janë perfekte për rutinën tënde të përditshme. Dhe pjesa më e mirë? Janë ekonomike, të lehta për t'u gjetur dhe i përshtaten çdo lloj stili jetese. Hajde, zbulojmë çfarë ushqimesh ia vlen të shtosh në pjatën tënde për netë më çlodhëse.

Ushqimet që të futin në “sleep mode”

Qershitë (sidomos vishnjet) janë yjet kur vjen puna te gjumi i mirë. Ato përmbajnë melatoninë natyrale, një substancë që lidhet drejtpërdrejt me ciklin e gjumit dhe zgjimit. Një tas i vogël me qershi, ose një gotë lëng i freskët vishnje, është një snack i lehtë dhe freskues pikërisht para se të flesh.

Bananja është një nga snack-et më të thjeshta që mund të bëhet pjesë e rutinës sate të mbrëmjes. Ajo ka magnez dhe kalium, dy elementë thelbësorë që ndihmojnë në relaksimin e muskujve dhe funksionimin normal të sistemit nervor. Mund ta kombinosh me pak kos ose arra për një efekt më të plotë.

Arrat janë një shtesë e vogël, por plot forcë, në dietën tënde. Bajamet, për shembull, janë plot magnez, një lëndë ushqyese që dihet se qetëson organizmin. Një grusht i vogël para gjumit është një snack inteligjent, pa shumë kalori dhe shumë, shumë i mirë.

Një tas me kos mund të jetë aleati yt ideal kur kërkon diçka të lehtë para gjumit. Produktet e qumështit kanë proteina dhe triptofan, një aminoacid që ndihmon në prodhimin e substancave që lidhen me relaksimin dhe humorin. Shto pak tërshërë ose fruta dhe ke gati një “midnight snack” super “healthy”!

Tërshëra lidhet zakonisht me mëngjesin, por, besoni ose jo, është edhe një zgjedhje e shkëlqyer për darkë. Karbohidratet komplekse që përmban të bëjnë të ndihesh më i ngopur, pa e rënduar organizmin. Një krem i ngrohtë tërshëre me kanellë dhe banane është një “comfort food” që shkon fiks me mbrëmjet e ftohta apo thjesht kur do të relaksohesh.

Salmoni, toni dhe peshqit e tjerë të yndyrshëm janë burime të rëndësishme të acideve yndyrore Omega-3 dhe vitaminës D. Këto lëndë ushqyese janë studiuar për lidhjen e tyre me shëndetin në përgjithësi dhe me cilësinë e gjumit. T'i bësh pjesë të një diete të balancuar të jep shumë, shumë përfitime.

Po çfarë duhet të shmangim, ore?

Ashtu si ka ushqime që të ndihmojnë, ka edhe zakone që mund ta bëjnë gjumin një mision të pamundur. Kafeja e tepërt, pijet energjike, shumë sheqer ose vakte shumë të rënda vonë në mbrëmje, mund të ndikojnë te pushimi yt. Një darkë më e lehtë dhe e balancuar është gjithmonë zgjedhja më e mençur.

Në fund të fundit, cilësia e gjumit nuk varet vetëm nga ajo që ha, por nga mënyra jote e jetesës në tërësi. Një rutinë e qëndrueshme, më pak kohë para ekraneve para gjumit dhe zgjedhje të mira ushqimore mund të krijojnë ambientin perfekt për t'u çlodhur si njeriu. Herën tjetër që po kërkon snack-un e përsosur të mbrëmjes, ndoshta zgjidhja të ndodhet direkt në kuzhinë. A je gati për një gjumë të thellë si kurrë më parë?