Tayna s'e mban dot më! Reagon epikisht për studentët: Shqipëria është e popullit të vet, jo e partive!

Tayna, këngëtarja e njohur, ka shpërthyer me një mesazh të gjatë në rrjetet sociale ditën e premte, duke folur hapur për situatën në Shqipëri dhe protestën studentore. Ajo tregoi se prej disa ditësh po ndiqte zhvillimet, por atë ditë, më në fund, ndihej e detyruar të shprehte qëndrimin e saj haptazi. Ishte një reagim i fortë, ku Tayna nuk kursente askënd, nga politikanët e deri te ata që mund të tentonin të shfrytëzonin situatën.

Pushteti në shërbim, jo mbi popullin

Artistja fillimisht theksoi një të vërtetë themelore: Para çdo bindjeje politike, duhet të kujtojmë një gjë shumë të thjeshtë: Jemi njerëz para se të jemi çdo gjë tjetër. Sipas Taynës, të mbash një pozicion drejtues, qoftë kryeministër apo president, nuk të bën "mbi popullin", por në shërbim të tij. Dhe kjo përfshin edhe kritikët, edhe ata që dalin në rrugë duke kërkuar një të ardhme më të mirë. Sepse një popull nuk ka nevojë vetëm për dikë që ta udhëheqë. Ai ka nevojë për dikë që ta dëgjojë, u shpreh ajo, duke theksuar rëndësinë e dialogut dhe të dëgjimit të zërit të qytetarëve, sidomos të të rinjve.

Studentët, shpresa e një kombi

Në mesazhin e saj, këngëtarja theksoi veçanërisht rëndësinë që studentët kanë për të ardhmen e vendit. Ajo foli me pasion për ëndrrat, ambiciet dhe talentet e vajzave dhe djemve që dëshirojnë të ndërtojnë diçka në vendlindje. Po ashtu, nuk harroi të përmendte sakrificat e prindërve, të cilët çdo ditë punojnë me shpresën se fëmijët e tyre do të kenë një jetë pak më të lehtë. Studentët meritojnë kushte dinjitoze, mundësi dhe një sistem që ushqen ëndrrat e tyre, jo t'i shuajë ato, tha Tayna. Ajo e lidhi këtë edhe me karrierën e saj, duke kujtuar se një pjesë e madhe e publikut që e ka mbështetur ndër vite përbëhet pikërisht nga të rinj dhe studentë. Nuk mund ta harroj këtë pikërisht tani kur ata kanë nevojë që zëri i tyre të dëgjohet, shkruan ajo, duke treguar mbështetjen e saj të plotë.

Pa dhunë, me kërkesa të qarta

Megjithatë, artistja bëri një thirrje të qartë dhe të rëndësishme që protestat të mbeten paqësore. Ajo iu drejtua policisë, duke theksuar se detyra e saj është të mbrojë qytetarët, jo t'i frikësojë dhe se uniforma duhet të përfaqësojë siguri dhe besim. Ama, kërkoi me forcë që dhuna të mos vijë as nga protestuesit, as nga individë që mund të tentojnë të shfrytëzojnë situatën për interesa të tjera, duke mjegulluar kuptimin e një proteste që duhet të jetë për të ardhmen e studentëve. Tayna inkurajoi studentët të qëndronin të bashkuar, të formulonin qartë kërkesat e tyre dhe të mos lejonin që zëri i tyre të përdorej nga interesa që nuk i përfaqësonin. Do të ishte shumë e dhimbshme që e gjithë kjo kurajo, e gjithë kjo përpjekje dhe e gjithë kjo shpresë të humbasë në konflikt, paralajmëroi ajo.

Dialogu, zgjidhja e vetme

Në pjesën përmbyllëse të mesazhit, këngëtarja kërkoi që përfaqësuesit e pushtetit të mos e shihnin dialogun si dobësi, por si përgjegjësi thelbësore ndaj popullit. Dialogu nuk është dobësi dhe të pranosh shqetësimin e dikujt nuk do të thotë të humbësh autoritet, tha ajo. Madje shtoi se gjëja më e madhe që një njeri i pushtetshëm mund të bëjë është të ulet përballë atyre që nuk bien dakord me të dhe të thotë: Unë po dëgjoj. Le të gjejmë një zgjidhje së bashku. Tayna e mbylli mesazhin me një reflektim të fortë mbi të ardhmen dhe përgjegjësinë: Shqipëria nuk është e një partie, e një qeverie apo e një individi. Shqipëria është e popullit të vet. Ajo shpreson sinqerisht të gjendet një rrugë komunikimi, mirëkuptimi dhe zgjidhjeje, ku dinjiteti i askujt nuk shkelet dhe zëri i të rinjve shihet si mundësi, jo kërcënim. Sepse, siç theksoi ajo, pushteti është i përkohshëm, pozicionet janë të përkohshme, por gjurmët që lëmë në jetën e njerëzve mbeten. A do ta dëgjojnë thirrjen e Taynës politikanët, apo do vazhdojë drama si zakonisht?