Blerina Matraku reagon pas videove intime: Mos i shpërndani më, po paguaj në mënyrë çnjerëzore

Këngëtarja Blerina Matraku ka bërë një reagim publik, pasi u publikuan dhe shpërndanë video intime ku ajo shfaqet së bashku me kompozitorin Adrian Hila.

Përmes një deklarate në rrjetet sociale, Matraku kërkon falje për situatën e krijuar. Në të njëjtën kohë, ajo i bën apel publikut që të ndalojë shpërndarjen e këtyre materialeve, duke thënë se nuk kërkon të justifikojë veprimet e saj, por të marrë përgjegjësi për to.

Matraku shprehet se besimi që ajo kishte dhënë në një moment të vështirë të jetës së saj, u përdor për arsye që, sipas saj, mbeten ende të paqarta. Ajo thekson se nuk dëshiron të mbrohet, por të kërkojë falje dhe t’u drejtohet të gjithëve që janë tronditur apo prekur nga kjo situatë, duke u kërkuar të shohin përtej imazheve që sipas saj nuk përfaqësojnë askënd, por ofendojnë të gjithë.

Artistja tha se ajo po përballet me sfidën më të madhe dhe me përgjegjësinë më të madhe sociale, jo vetëm atë morale. Kërkoj falje për besimin që i dhashë dikujt në momentet më të cenueshme të jetës sime, besim që më përdori për arsye të panjohura dhe të paidentifikuara, shkruan ajo. Matraku kërkon falje edhe Klaudias dhe vajzave të saj, për çdo lot apo dhimbje të shkaktuar.

Ajo shtoi se pavarësisht shkeljes çnjerëzore të privatësisë së saj, merr përgjegjësi për veprimet, për të cilat tha se po paguan si me jetën. Blerina Matraku thekson se është thjesht një artiste me profil të ulët artistik, pa famë, çmime apo mbështetje, një grua që ka hasur e vetme sfidat e jetës. Apeli i saj përfundon me kërkesën: Mjaft, mos i shpërndani më… Gabimet kërkojnë përgjegjësi, të cilën po e marr mbi supe dhe po e paguaj në mënyrë çnjerëzore. Dhimbja kërkon respekt. Mjaft, ju lutem. Jam një qenie njerëzore, privatësia e së cilës është shkelur…

Ajo shpreson që mesazhi të përcillet, sepse është shumë e vështirë të marrësh veten në këto momente.