Gillian Anderson sqaron videon virale me fansat e rreshtit të parë
Gillian Anderson, aktorja 58-vjeçare e njohur për rolet ikonike në "Sex Education" dhe "X-Files", e ka bërë namin sërish, por këtë herë jo në ekran, por në skenën e West End në Londër. Një video e saj teksa i thotë një grupi fansash të mos ulen në rreshtin e parë, pasi po e shpërqendronin, u bë virale në rrjetet sociale, duke ngjallur polemika dhe diskutime pafund.
Anderson, aktualisht është pjesë e shfaqjes "Kush i Frikësohet Virginia Woolf?" në teatrin Soho Place, ku ajo interpreton rolin e Martës, një grua e frustruar në një martesë të pakënaqur.
Pse Gillian “shpërtheu”?
Në videon e xhiruar jashtë teatrit, Anderson u tha fansave se nuk mund të ulen në rreshtin e parë, sepse e shpërqendrojnë. Ajo shtoi se nuk mund të vijnë 20 herë dhe të ulen aty. Fansat, që nuk shihen në video, dëgjohen duke u përgjigjur me "Më falni" dhe "E di".
Sqarimi në rrjetet sociale: Ishte shaka me mikeshat e vjetra!
Pas valës së komenteve dhe reagimeve në TikTok, aktorja vendosi të sqaronte situatën në X (ish-Twitter). Ajo shkroi se në video po fliste me gra që i njeh prej mbi 20 vitesh dhe i luti njerëzit të mos thonë asgjë negative për to.
Megjithatë, ajo shtoi se ekipi është i entuziazmuar për shfaqjen, por i kërkoi njerëzve në rreshtin e parë të kenë parasysh se në një ambient kaq intim të gjithë mund t'i shohin dhe se kjo nganjëherë mund të jetë pak shpërqendruese. Postimin e mbylli duke i falënderuar të gjithë ata që vijnë.
Nuk është incident i izoluar: Yjet e tjerë me “dhimbje koke” nga publiku
Në fakt, nuk është hera e parë që aktorët e famshëm ankohen për sjelljen e publikut në teatër. Muajin e kaluar, Cate Blanchett iu kërkoi shikuesve të shfaqjes së saj "Electra/Persona" të linin mënjanë telefonat gjatë përshëndetjes në fund. Ajo tha se e kupton që ju pëlqen të filmoni, por i luti ata që filmojnë shfaqjen ta ndalojnë, sepse ua prish përvojën grupit tjetër të shikuesve.
Në maj, Rosamund Pike kritikoi një shikues që dërgonte mesazhe gjatë shfaqjes së saj "Inter Alia" në West End. Ajo i tha audiencës se dikush po dërgonte mesazhe në një pjesë të shfaqjes dhe se aktorët i shohin e i ndiejnë këto gjëra, edhe nëse mesazhi mund të ketë qenë i rëndësishëm.
Në prill, ylli i "Wicked", Cynthia Erivo, ndërpreu performancën e saj të "Drakulës" pasi pa një shikues që regjistronte ilegalisht shfaqjen. Ndërsa në maj, ylli i "The Pitt", Isa Briones, u tha fansave të ndalonin së bërtituri referenca nga drama mjekësore gjatë musicalit të saj në Broadway. Madje edhe Kristin Scott Thomas, e cila pritet të performojë në "Kopshti i Qershive" këtë muaj, tregoi për "Financial Times" se njëherë kishte parë një shikues duke ngrënë një vakt të gatshëm në rreshtin e parë! Dhe nuk janë vetëm aktorët, pasi edhe shikuesit kanë ankesat e tyre: në qershor, disa prej tyre u ankuan për një fëmijë që zhurmonte gjatë një performance të "Stuhisë" me Kenneth Branagh, dhe nëna me foshnjën u kërkua të largoheshin për pjesën e dytë, pasi disa shikues kërkuan rimbursim.
Duket se të gjithë duam respekt, si artistët ashtu edhe publiku. Por, a duhet t'i mbajmë telefonat në xhep kur shkojmë në teatër, apo çmimi i biletës na jep të drejtën të bëjmë ç'të duam? Flasim pas shfaqjes!