Ukay-ukay na haunted? Xyriel Manabat at Karina Bautista, bida sa True Manila Encounters

Hindi lang basta fashion find ang makukuha niyo sa ukay-ukay dahil baka may kasama na itong sumpa. 'Yan ang plot ng first episode ng True Manila Encounters na pinamagatang Undressed, kung saan bida ang mga aktres na sina Xyriel Manabat at Karina Bautista.

Sa kwentong ito, gaganap si Karina bilang si Pearl, isang babaeng pilit itinatago ang kanyang kakayahang makakita ng mga espiritu para lang magkaroon ng normal na buhay. Pero magugulo ang lahat nang bumili ang kanyang coworker na si Mei-Mei, na ginagampanan ni Xyriel, ng isang thrifted dress. Ang problema, may madilim na kasaysayan pala ang damit at magigising nito ang isang restless presence.

Sino pa bang mag-uukay after nito? Para sa mga mahilig sa horror, siguradong quality ito dahil si Rae Red, ang director ng Birdshot at Eerie, ang humawak sa episode na ito. Mapapanood ang Undressed sa iWant simula 29 October.

Horror sa video call

Hindi lang ukay-ukay ang dapat katakutan dahil may isa pang episode na Occupant. Dito naman, ang mga bida ay sina Kaori Oinuma at Elyson de Dios. Iikot ang storya nina Ana (Kaori) at Jam (Elyson) na nasa isang long-distance relationship.

Akala niyo romantic? Plot twist: magsisimulang magkaroon ng mga disturbing events tuwing mag-video call ang dalawa. Habang unti-unting ginigipit ng isang unseen force si Ana, kailangang gumawa ng paraan si Jam para iligtas siya bago pa maging huli ang lahat. Ang episode na ito ay idinirek ni Dodo Dayao, ang nasa likod ng mga pelikulang Uninvited at Violator.

Ang Occupant naman ay mag-i-stream sa iWant sa 5 November. Ang buong limited anthology series na ito ay produced ng CreaZion Studios at base sa mga frightening accounts na isinumite ng mga tao mula sa iba't ibang bahagi ng Metro Manila.

Sino dito ang may ukay-ukay dress na feeling niyo ay may 'kasama'?