Oasis bllokon ankandin e incizimeve të padëgjuara: 'Drama' me vlerë miliona paund!

Oasis i ka vënë fre shitjes së një koleksioni të jashtëzakonshëm incizimesh të padëgjuara, mes të cilave kishte koncerte live, prova dhe biseda të sinqerta mes Noel dhe Liam Gallagher. Kasetat, të cilat pritej të shiteshin për shifra marramendëse deri në 1.6 milionë paund, u tërhoqën nga ankandi pas një padie nga vetë banda.

Ky thesar i vërtetë, që përfshinte 209 kaseta DAT, 73 kaseta analoge dhe tre MiniDisqe, ishte mbledhur nga ish-inxhinieri i zërit të bandës, Huw Richards. Ai ka punuar me Oasis që nga publikimi i albumit të tyre debutues, “Definitely, Maybe”, në vitin 1994, deri në vitin 2001. Djali i tij, Owain Richards, po i nxirrte tani në shitje.

Ankandi “Littleton Auctions” në Worcestershire, Angli, kishte vendosur një çmim orientues mes 1.2 dhe 1.6 milionë paund. Ben Homer, drejtori menaxhues i shtëpisë së ankandeve, konfirmoi se incizimet, të njohura si “The Desk Tapes”, u tërhoqën nga ankandi i planifikuar për 3 tetor, për shkak të procedurave ligjore. Homer tha se shtëpia e ankandeve është shumë e zhgënjyer që nuk mund ta ofrojë këtë arkiv siç ishte planifikuar.

Vetë Owain Richards pranoi se Oasis i ka paditur atë dhe babanë e tij për të penguar shitjen e kasetave. Ai shtoi se janë pajtuar ta shtyjnë ankandin që mosmarrëveshja ligjore të zgjidhet në mënyrë të rregullt. Sipas Richards, audioja ishte në gjendje të mirë, por të drejtat e pronësisë intelektuale i mbeten Oasis, kështu që blerësi i ri nuk mund t'i publikonte pa bashkëpunimin e bandës.

Ankandi do të vazhdojë gjithsesi më 3 tetor me memorabilet e tjera muzikore. Mes tyre do të ketë një parka origjinale Kangol e turneut të Oasis nga koleksioni i Richards, si dhe fotografi të firmosura nga Nirvana, autografe të dy anëtarëve të Rolling Stones dhe një kitarë e firmosur nga Brian May. Homer tha se pjesa tjetër e shitjes nuk preket dhe do të zhvillohet normalisht.