انزلہ عباسی نے مزاحیہ انداز میں حمل کا اعلان کر دیا!

پاکستانی اداکارہ، ماڈل اور گلوکارہ انزلہ عباسی اور ان کے شوہر تاشفین انصاری نے فینز کے ساتھ خوشخبری شیئر کی ہے کہ ان کے ہاں ننھے مہمان کی آمد متوقع ہے۔ یہ اعلان انہوں نے ایک مزاحیہ انسٹاگرام ریل کے ذریعے کیا جو دیکھتے ہی دیکھتے سوشل میڈیا پر وائرل ہو گئی۔

تاشفین نے اس خبر کو ایک زبردست کیپشن کے ساتھ شیئر کیا تھا: ”اسے کیسے بتاؤں کہ میں حاملہ ہوں اور باپ وہ ہے؟“ بھئی یہ تو ٹریڈیشنل اناؤنسمنٹس کو ٹکر دینے والی بات ہو گئی۔ کون کہہ رہا ہے میاں بیوی راضی تو کیا کرے گا قاضی؟ یہاں تو دونوں نے دنیا کو ہی چپ کروا دیا!

ریل میں انزلہ عباسی ایک خوبصورت نیلے رنگ کی پھولدار ساڑھی میں نظر آئیں جس پر گوٹا پٹی کا کام ہوا تھا، جبکہ تاشفین بھی کافی خوش اور چہکتے ہوئے دکھائی دیے۔

اس انوکھے اعلان پر دوستوں اور سوشل میڈیا صارفین نے جوڑے کو مبارکباد دی اور نیک تمناؤں کا اظہار کیا۔ سب نے اس خبر پر خوشی کا اظہار کیا اور ننھے مہمان کی آمد کا جشن منانے والے تبصروں کی لائن لگ گئی۔

انزلہ عباسی پاکستانی انٹرٹینمنٹ انڈسٹری کا جانا پہچانا چہرہ ہیں۔ وہ ڈراموں جیسے 'لال عشق' (جسے خلیل الرحمان قمر نے لکھا تھا)، 'میں ہار نہیں مانوں گی'، 'کینوس'، 'حقیقت'، 'نباہ' اور 'گلہ' میں اپنی اداکاری کی وجہ سے جانی جاتی ہیں۔ وہ معروف اداکار جویریہ عباسی اور شمون عباسی کی بیٹی ہیں۔

ان کی شادی اپنے دیرینہ دوست اور منگیتر تاشفین انصاری سے اگست 2023 میں ایک اسٹار اسٹڈڈ تقریب میں ہوئی تھی۔

یہ حمل کا اعلان ان کی زندگی کا ایک خاص باب ہے اور ان کے مزاحیہ انداز نے اس جشن میں ایک ذاتی ٹچ شامل کر دیا ہے۔ بھئی، اب انتظار ہے کہ یہ ننھا مہمان کس پر جائے گا، مما پر یا پاپا پر؟