Këngëtarët që dikur punonin punë krejt të zakonshme para se të bëheshin të famshëm

Para se të pushtonin skenat botërore dhe të bëheshin fytyrat që i shohim kudo, disa prej këngëtarëve më të famshëm sot kanë pasur punë krejt të zakonshme. Nga furrat e bukës dhe supermarketet, te restorantet, pikat e karburantit dhe sallonet e bukurisë, rrugëtimi i tyre ka nisur shumë larg luksit dhe famës.

Harry Styles: Nga brumi te superstari

Po, po! Para se të bëhej pjesë e “One Direction” dhe më pas një prej këngëtarëve më të suksesshëm në botë, Harry Styles punonte në një furrë buke në Holmes Chapel, Angli. Revista “Vogue” ka treguar se ai punonte në “W. Mandeville Bakery” dhe fitonte rreth gjashtë paund në orë. Kush do ta kishte menduar se duart që mbanin tabaka me brumë, një ditë do të kapnin mikrofonin para miliona fansash?

Beyoncé: Mbretëresha e dyshemesë (dikur)

Besojeni ose jo, puna e parë e Beyoncé, diva që sot sundon botën me zërin dhe performancat e saj, ka qenë shumë më e thjeshtë nga sa mund të imagjinohet. Ajo vetë tregoi në vitin 2023 se detyra e saj e parë ishte pastrimi i flokëve nga dyshemeja në sallonin e flokëve të mamasë së saj, Tina Knowles. Madje, grupi “Destiny’s Child” kishte filluar të performonte për klientet pikërisht aty. Kështu, salloni i vogël i nënës së saj u bë një nga vendet ku ajo nisi të zhvillonte talentin e saj.

Lady Gaga: Nga banaku te suksesi

Para se të vishte veshjet ekstravagante dhe të thyejë çdo tabu si Lady Gaga, Stefani Germanotta ka punuar fort për të financuar ëndrrën e saj muzikore. Në një intervistë me Larry King, Gaga rrëfeu se për vite me radhë kishte punuar si kamariere dhe banakiere. Që në moshën 15-vjeçare, ajo i përdorte paratë e fituara për regjistrimet dhe aktivitetet muzikore në New York. Një frymëzim për të gjithë ata që punojnë dhe ëndërrojnë njëkohësisht!

Cardi B: Nga supermarketi te yjet e repit

Para se të shpërthente me hitet e saj dhe të bëhej një prej repereve më të njohura në botë, Cardi B ishte thjesht një arkëtare në supermarketin “Amish Market” në New York. “Vogue” shkruan se Cardi B punonte aty ndërsa ndiqte kolegjin dhe fitonte rreth 290 dollarë në javë. Edhe pse të ardhurat nuk i mjaftonin, ajo nuk u dorëzua, por e ndërroi punën me atë të kërcimtares, derisa karriera e saj në rrjetet sociale e më pas në muzikë shpërtheu.

Shania Twain: Nga McDonald’s te ylli i country-pop-it

Shania Twain, mbretëresha e country-pop-it, dikur ka punuar në McDonald’s. Rreth moshës 17-vjeçare, ajo punonte pas shkollës në McDonald’s, ndërkohë që në mbrëmje punonte edhe në një bar. Të gjitha këto ndërsa përpiqej të niste karrierën e saj muzikore. Një shembull i kombinimit të shkollës, punës dhe muzikës.

Carrie Underwood: Nga pika e karburantit në “American Idol”

Kush e dinte se para se të fitonte “American Idol” në vitin 2005 dhe të bëhej një yll i muzikës country, Carrie Underwood ka punuar në një pikë karburanti? Ajo ka treguar se kjo ishte puna e saj e parë, dhe përveç saj, ka punuar edhe në një hotel. Imagjinoni ta shihni Carrie-n duke ju mbushur makinën me benzinë… ndërsa ajo nuk e dinte që jeta e saj do të ndryshonte përgjithmonë pas një audicioni!

Kelly Clarkson: Klubi i komedisë si trampolinë

Kelly Clarkson, fituesja e parë e “American Idol” dhe sot një zë i fuqishëm në muzikë, dikur ishte kamariere në një klub komedie në Burleson, Texas. Ajo punonte aty për të siguruar të ardhurat e nevojshme ndërsa ndiqte ëndrrën e saj për t'u bërë këngëtare. Duket se klubi i komedisë i solli fat, duke i hapur rrugën drejt një karriere të jashtëzakonshme!

Mariah Carey: Nga garderoba te suksesi

Mariah Carey kaloi një periudhë shumë modeste në New York. Ajo punonte si kamariere dhe punonjëse në garderobë, ndërsa në të njëjtën kohë shkruante këngë dhe punonte si “backing vocalist”. Një tjetër histori që tregon se edhe yjet më të mëdhenj kanë filluar nga zeroja, duke u përballur me konkurrencë të jashtëzakonshme. A nuk të bën të thuash “respekt” për këmbënguljen?

Kështu që herës tjetër që shihni një yll në skenë, mbani mend se ndoshta dikur ai ka palosur bluza apo ka fshirë dysheme. Ku e keni pasur ju punën e parë?