“Digger” i Tom Cruise: Nga dështim rekord në pritje për Oscar? Vështirë!

“Digger”, projekti i ri i Tom Cruise, po përballet me një rënie të fortë në arkë dhe rrezikon të bëhet një nga dështimet më të mëdha financiare në historinë e Hollywood-it. Edhe pse biletat nuk po shiten, ironikisht, filmi mund të jetë ende në garë për një Oscar, duke sjellë një situatë thuajse absurde.

Tom Cruise, aktori dhe producenti i njohur amerikan, gjen veten në qendër të një drame financiare. I drejtuar nga Alejandro G. Iñárritu, një regjisor fitues i shumëfishtë i Oscar-it, i njohur për filma si “Birdman” dhe “The Revenant”, “Digger” ishte menduar të ishte një kombinim i artit dhe suksesit komercial. Por, gjërat s'po shkojnë fiks si duhet.

Gjërat s'po shkojnë si duhet në arkë

Filmi, një satirë e errët, regjistroi një rënie prej rreth 60 për qind të shitjeve të biletave në fundjavën e dytë, duke shtuar shqetësimet për performancën e tij komerciale. Në fundjavën e parë, “Digger” grumbulloi vetëm tetë milionë dollarë në kinematë amerikane dhe rreth 12 milionë dollarë nga 74 tregje ndërkombëtare. Pas fundjavës së dytë, të ardhurat totale arritën në rreth 14.4 milionë dollarë në SHBA dhe 35.3 milionë dollarë globalisht.

Vlerësimet e industrisë tregojnë se “Digger” mund ta mbyllë ciklin e tij në kinema me vetëm rreth 50 milionë dollarë arkëtime globale. Kjo është shumë, po shumë larg shumës që filmi duhet të siguronte për të mbuluar kostot. Raportimet sugjerojnë se projekti ka nevojë për rreth 350 milionë dollarë globalisht për të dalë në pikën e barazimit, duke marrë parasysh se kinematë mbajnë një pjesë të madhe të të ardhurave nga biletat.

Warner Bros. e miratoi fillimisht filmin me një buxhet rreth 125 milionë dollarë, por kostot e prodhimit u rritën në rreth 180 milionë dollarë, pasi xhirimet tejkaluan afatet. Përveç kësaj, studioja raportohet se ka shpenzuar edhe rreth 100 milionë dollarë për marketing. Po t’i bësh llogaritë, humbjet mund të arrijnë deri në rreth 245 milionë dollarë, duke e bërë “Digger” një nga gafat më të mëdha financiare të Hollywood-it.

Nuk është e para herë, por kjo është serioze

Nëse këto shifra konfirmohen, “Digger” do të renditej mes humbjeve më të mëdha financiare të historisë së kinemasë. Si “John Carter” i Disney-t, i vitit 2012, me rreth 161 milionë dollarë humbje, ose “The Lone Ranger”, që vetëm një vit më vonë humbi rreth 160 milionë dollarë. Edhe “Cutthroat Island” i Renny Harlin, i vitit 1995, ka hyrë në histori si një nga dështimet më ikonike, duke kontribuar në falimentimin e studios Carolco Pictures.

Edhe Tom Cruise ka pasur filma problematikë në box office. “Lions for Lambs” i vitit 2007 nuk theu botën, megjithëse buxheti i tij ishte vetëm rreth 35 milionë dollarë. Dhjetë vjet më vonë, tentativa për të ngjallur serinë “The Mummy” u konsiderua gjithashtu një dështim i madh, me humbje të raportuara rreth 95 milionë dollarë. Por “Digger” mund t’i kalojë shumë këto raste, nëse trendi aktual vazhdon, duke e lënë Cruise në një pozicion… të papritur.

Një Oscar mes rrënojave financiare?

Paradoksi më i madh është se “Digger” nuk ishte konceptuar vetëm si një film i madh komercial. Ai shihej edhe si një nga projektet që mund t’i sillte Tom Cruise nominimin e tij më të rëndësishëm për Oscar pas shumë vitesh. Warner Bros. raportohet se ka planifikuar rreth 15 milionë dollarë vetëm për fushatën e çmimeve, duke treguar sa seriozisht e kishin marrë.

Në këtë komedi të zezë satirike, Cruise interpreton Digger Rockwell, një manjat të pasur të industrisë së naftës që shkakton një katastrofë mjedisore dhe pastaj përpiqet të bindë botën se pikërisht ai është i vetmi njeri i aftë ta shpëtojë atë. Një rol që i bën sytë të shkëlqejnë Akademisë, normalisht.

Filmi është pritur në mënyrë shumë të polarizuar nga kritika, por disa zëra në Hollywood besojnë se performanca e Cruise mund të mbetet në diskutim për sezonin e çmimeve, pavarësisht katastrofës komerciale. Aktori mori vitin e kaluar një Oscar nderi për kontributin e tij katërdekadësh në industrinë e filmit, por një nominim për aktorin më të mirë do të ishte diçka tjetër.

Sipas parashikimeve të Gold Derby, Cruise renditet ende mes emrave që mund të konkurrojnë për nominim për aktorin më të mirë, megjithëse gara pritet të jetë shumë e fortë. Kështu, mes gjithë këtij dështimi, Cruise mund të jetë duke parë drejt asaj statuje të artë. Ironike, apo jo?

Fushata e marketingut – “Goditini me të vërtetën e fortë!”

Pas rezultateve të dobëta në arkë, Warner Bros. duket se ka ndryshuar taktikë promovimi. Llogaritë zyrtare të filmit në rrjetet sociale kanë filluar ta përdorin vetë polarizimin si pjesë të fushatës. Komentet pozitive të fansave po ripostohen, shpesh të shoqëruara me përgjigje bombastike që imitojnë stilin e personazhit të Cruise: “HIT ’EM WITH THE HARD TRUTH” – “Goditini me të vërtetën e fortë”.

Madje, një reklamë që sulmonte direkt kritikët amerikanë u shpërnda në X muajin e kaluar, teksa nisën të publikoheshin recensionet. Reklama thoshte: “Amerika ka qëndruar përkrah botës në orët e saj më të errëta”, duke shfaqur më pas citime nga kritikë të vendeve të ndryshme me flamujt përkatës. Një kritik meksikan e cilësonte “epik, të jashtëzakonshëm dhe therës”, ndërsa faqja amerikane “The Playlist” e përshkruante si “grotesk dhe qëllimisht kitsch”. Një francez e quante “një perlë inteligjence”, ndërsa “New York Post” e cilësonte “një film pa dashje të keq”. Reklama, që përfundonte me personazhin e Cruise, u hoq nga X, por reagimet e përdoruesve mbetën.

Disa fansa e interpretuan këtë fushatë si provokim ndaj publikut amerikan dhe madje si një arsye shtesë për ta parë filmin. Megjithatë, ironia e fatit është se “Digger” nuk ka performuar veçanërisht mirë as në tregjet ndërkombëtare, duke e bërë fushatën një lëvizje disi të pakuptimtë. Si mund të shpëtosh botën, kur s'po shpëton dot filmin tënd?

Dështimi financiar është thuajse i sigurt, por ambiciet për Oscar? Historia ka treguar se Akademia ndonjëherë sheh përtej numrave në arkë. Megjithatë, a do të mjaftojë performanca e Cruise për të lënë pas një gropë financiare kaq të madhe? Mbetet për t’u parë, por një gjë është e sigurt: kjo histori është më dramatike se çdo film vetë!