magtatayo ng school building sa Lawaan Elementary School sa Cebu

Magtatayo ang GMA Kapuso Foundation ng isang Kapuso School Building sa Lawaan Elementary School sa Talisay, Cebu. Ang bagong building na ito ay magkakaroon ng tatlong classrooms at isang comfort room para matugunan ang problema sa kakulangan ng silid-aralan dahil sa dami ng mga estudyante rito.

Naging evacuation center ang Lawaan Elementary School noong nasalanta ng Typhoon Tino ang bahagi ng Visayas noong November 2025. Isa ang pamilya ni Maria Siatanan sa mga sumilong sa paaralan noon. Ayon kay Maria, Mahirap po ma'am sa umpisa... wala na kaming gamit, nag evacuate kami dito walang wala na talaga, pero marami rin ang nagbigay ng tulong sa kanila.

Naging posible ang construction ng building sa tulong ng ADM Cares. Sabi ni Rikki Escudero-Catibog, EVP at COO ng GMA Kapuso Foundation, talagang ginagawa para tumagal ang mga Kapuso Schools. Aniya, nag-donate ang ADM Cares at hiniling na para ito sa isang school sa Talisay dahil gusto talaga nilang tumulong.

Para naman kay Reynaldo Geverola, plant manager ng ADM Animal Nutrition, pinili nilang makipagtulungan sa GMA Kapuso Foundation dahil aligned ang kanilang organisasyon sa mga project para sa development ng paaralan. Pinuri rin niya ang track record ng foundation sa paggawa ng ganitong mga proyekto.

Sa mga gustong sumuporta sa mga projects ng GMA Kapuso Foundation, pwedeng mag-donate via GCash, Lazada, Shopee, Palawan Pay, Cebuana Lhuillier, Metrobank, Land Bank, BDO, Bank of Commerce, UnionBank, at PNB. May iba pang impormasyon sa website ng foundation.

Noong November 2025, iniulat ng Office of Civil Defense na umabot sa 269 ang namatay dahil sa Typhoon Tino. May 523 din ang nasugatan at 113 ang naiulat na missing.