Kim Soo-hyun, naiyak sa sobrang love ng Pinoy fans sa Manila

Grabe talaga ang hatak ni Kim Soo-hyun sa mga Pinoy! Umapaw ang emosyon sa SM Mall of Asia Arena noong October 2, kung saan nagtipon-tipon ang halos 20,000 fans para sa 'Our Forever with You' fan meeting. Ang event na ito ay inorganisa ng fashion brand na Bench.

Kitang-kita ang bonding ng actor sa mga fans dahil nagkantahan, nagyakapan, at talagang naging heartfelt ang atmosphere. Ayon kay Sam Oh, ang Korean-born broadcaster na nag-host ng event at matagal na ring naninirahan at nagtatrabaho sa Pilipinas, naging movemting experience ito para sa lahat dahil sabay-sabay silang tumawa at umiyak.

Sa mga videos na shinare ni Sam Oh sa social media, masayang-masaya si Kim Soo-hyun. Pumasok siya sa stage gamit ang isang lift, kaway rito, ngiti roon, at talagang ramdam na happy siya na makita ang crowd. Hindi rin siya nagtipid sa interaction dahil nakipag-Q&A siya at niyakap pa ang mga fans na pinayagang umakyat sa stage. May live performance pa siyang ginawa na talagang pinatunog ang buong arena sa hiyawan.

Pero ang pinaka-tear-jerker na part? Noong magpapaalam na siya. Habang kumakaway sa huling pagkakataon, hindi na nakayanan ni Kim Soo-hyun at halos maiyak na siya sa sobrang touch sa pagmamahal ng mga Pinoy fans.

Siyempre, hindi rin nagpahuli ang mga fans sa pag-comment sa posts ni Sam Oh. Marami ang nagpasalamat at sinabing ito na ang pinaka-special at hindi malilimutang gabi ng buhay nila.