Alden Richards, Michelle Dee, at Max Collins, nagpakitang-gilas sa Bench Fashion Week

Mainit na hinarap nina Alden Richards, Michelle Dee, at Max Collins ang runway sa Bench Fashion Week Holiday 2026. Kitang-kita ang aura ng mga Sparkle stars habang ibinibida ang mga latest looks sa fashion show.

Kahit mukhang effortless, inamin ng aktor na si Alden Richards na medyo tight ang schedule niya para rito. Ayon sa kanya, dalawang linggo na lang bago ang show ay saka lang siya pumayag, kaya halos wala na siyang oras para maghanda. Tinawag pa nga niya ang sitwasyon na the calm before the storm.

Pagdating naman kay Michelle Dee, na isang model at actress, strategy talaga ang puhunan niya para hindi mabulol sa kaba. Sinabi ni Michelle na kailangan niyang i-manage ang nerves niya para maging aware siya sa kanyang mga weaknesses. Para handang-handa pagdating ng showtime, pinu-practice niya raw at nire-reenact ang mga bagay na sa tingin niya ay magpaparkaba sa kanya.

Si Max Collins naman ay fresh na fresh pa mula sa Milan Fashion Week. Aminado rin siyang kinabahan bago ang kanyang pag-rampa, pero ginamit niya itong motivation. Para sa kanya, kung nakarating siya sa Milan Fashion Week, dapat ay mas maging confident siya sa pag-rampa rito sa bansa.

Sino kaya sa kanila ang pinaka-slay ang walk sa runway?