نسرين الراضي: حلم السينما العالمية والاعتراف "المُكَرْفَس" محلياً

نسرين الراضي، الممثلة المغربية، خرجات بتصريحات صريحة ومباشرة خلال استضافتها في برنامج «FBM لنعبر» على قناة ميدي 1 تيفي. كشفات الراضي على أسرار مسارها الفني، مؤكدة أن شغفها بالسينما، وعلاقتها الخاصة بالفن السابع، إضافة لحلم الطفولة اللي راودها باش تولي فنانة سينمائية عالمية، هوما اللي خلاوها كتشوف المشاركات الفنية ديالها كتعدد، وحضورها في أدوار البطولة بأعمال عالمية. الراضي، اللي كتعبر على راسها بأنها إنسانة حالمة كتحب تشوف أحلامها كتحقق، أوضحات أن رغبتها في الالتحاق بالمعهد العالي للفن المسرحي كانت عندها من الإعدادي، وهادشي خلاها تحدد أهدافها الفنية بكل وضوح.

ظلم محلي واعتراف عالمي

الممثلة أكدات أن من أجمل ما كيميز السينما هي قدرتها على الاعتراف بالممثل المزيان، بلا ما تشوف الجنسية ديالو. وبينات الراضي أن الممثل المغربي قادر يلعب أدوار البطولة فخدمات عالمية، ويتجاوز الأدوار الثانوية، لكنها شددات على أن الطريق صعيبة ومشقة.

نسرين الراضي عاودات كيفاش عانات وتعذبات من الظلم والتجريح، وبكات بزاف قبل ما توصل للنجاح وتجمع الإنجازات. وقالت أن جزء كبير من هاد المعاناة كان بسبب الأحكام المسبقة ديال الناس وعدم فهمهم لأهدافها، ولكن هي مكملاش وما عطاتش أهمية لكلام الناس. وانتقدات نسرين الميل عند شي مغاربة باش ينقصو من قيمة بعضياتهم وميقدروش المجهودات، معتبرة أن الدعم والتقدير من دول أجنبية جاوها فوقت كانت فيه كتقاسي من الظلم فبلادها، وهادشي خلاها تستثمر علاقاتها المهنية خارج المغرب فين فرضات احترامها وشقات طريقها نحو العالمية.

من السينما للتلفزيون للمسرح

بخصوص الدور ديالها في فيلم “توت الأرض”، نسرين قالت أن صعيب تحكم على الجودة ديال أي عمل من مشاهدة وحدة، خصوصا مع الجو والأحاسيس ديال الجمهور خلال العرض فالمهرجانات. ووضحات أنها محتاجة تشوفو مرة أخرى عاد تقدر تحكم عليه. وشددات الراضي على أن قيمة العمل الفني ماشي ديما بالجوائز، حيت التتويج كيبقى رهين بالرؤية والمعايير اللي كيعتمدوها لجان التحكيم، وأكدات أن الفيلم ما جاش من الفراغ، بل كان ثمرة ديال سنوات من الخدمة والاجتهاد واللقاءات المتواصلة مع العاملات.

أما علاقتها بالتلفزيون وقلة الظهور ديالها فيه، الراضي أوضحات أن مشاركتها فمسلسلات وأعمال تلفزيونية بأدوار بسيطة كتجي، فبزاف ديال المرات، باش تهرس رتابة الروتين وتجرب شي تجارب أقل إرهاق، بالمقارنة مع السينما اللي كتاخد بزاف ديال التعب والمجهود. ولكنها مزال مالقاتش الدور فالتلفزيون اللي كيتماشى مع الطموح ديالها وكيسمح ليها بالإبداع الفني والسينمائي اللي كتقلب عليه، وشددات على أن الأعمال التلفزيونية خاصها تستحضر الروح السينمائية.

وعلى الجدل اللي كيرافق المسار الفني ديالها، الراضي أكدات أنها مكديهالش فيه وماكيأثرش فيها، حيت الأهم بالنسبة ليها هو تكمل طريقها الفني وتركز على الأهداف ديالها. وعبرات على استغرابها من التركيز على بعض المحطات المثيرة للجدل فالمسيرة ديال الفنان، فالمقابل مكيكونش نفس الاهتمام ملي كيتحققو النجاحات والإنجازات الفنية.

نسرين الراضي أكدات أنها بنت المسرح، ولكن الطموح ديالها مرتبط بالسينما. ولكنها ماشي مانعة ترجع لخشبة المسرح الا توفرت الظروف المناسبة، بعمل مسرحي مزيان وبأجر محترم. وانتقدات الظروف اللي كيخدمو فيها المسرحيون فالمغرب، ووصفتها بالضعيفة وغير الملائمة. وهادشي كيستدعي تطوير هاد القطاع والرفع من الميزانية، إضافة للاهتمام بالممثلين وتحسين ظروف شغلهم. ورفضات الراضي تخدم فظروف غير مناسبة اللي مكاضمنش الحد الأدنى من الشروط المهنية.

نظرة مستقبلية متفائلة

الراضي ختمات كلامها بتفاؤل كبير بالمسار الفني اللي جاي، مؤكدة أن عندها رؤية واضحة للطموحات والأهداف ديالها. وبينات أن الأعمال والتجارب اللي جمعاتها فهاد المسيرة كتشكل ثمرة ديال الجدية والتنظيم، وكيعزز الثقة ديالها فاللي جاي.