بيتك ممكن يكون نظيف بس شكله مبهدل.. ودي الـ 8 حاجات اللي بتعمل كده

ممكن تقضي يومك كله في الترتيب والتنظيف وبرضه تحسي إن البيت مش «ملموم»، والسر هنا مش في النظافة نفسها، لكن في تفاصيل صغيرة بتدمر الشكل النهائي للمكان. في حاجات بنعملها بعفوية بس هي اللي بتدي إيحاء إن البيت فوضوي، زي الحاجات اللي بتتركن على الكراسي، أو الأسطح اللي مليانة كراكيب، أو حتى الإضاءة الوحشة اللي بتخلي المكان يبان زحمة أكتر من الحقيقة.

أول حاجة بتعمل «دوشة بصرية» هي الترابيزات والرفوف اللي مليانة حاجات صغيرة؛ لأن كل ما العين شافت تفاصيل أكتر، كل ما المكان بان مكركب حتى لو كل حاجة في مكانها. كمان الديكورات اللي ملهاش ستايل أو ألوان ماشية مع بعضها بتخلي البيت يبان إنه معمول كده بالبركة، والأفضل دايماً اختيار قطع قليلة وتكون لايقة على بعض.

الكنبة كمان ليها دور كبير، فلو المخدات والرميات مكرمشة ومترمية أي كلام، ده بيدي إيحاء فوراً إن الصالة مش مترتبة حتى لو باقي الأوضة زي الفل. ومن أهم المناطق اللي بتظلم البيت هي المدخل؛ لأن الشنط والجواكت والجزم اللي مش في مكانها بتدي انطباع إن البيت كله مقلوب.

وكمان زحمة البراويز واللوحات والرفوف على حيطة واحدة بتجهد العين، والمكان محتاج «مساحات فاضية» عشان يبان متوازن ونظيف.

الرفوف المفتوحة برضه سلاح ذو حدين، مابتكونش شيك غير لو فيها تناسق ونظام، غير كده بتفكّر بمخزن مش ديكور. وأخيراً، لو مفيش أماكن تخزين كفاية للأغراض اليومية، طبيعي الحاجات دي تترمي في كل مكان، وهنا الحل بيكون في السلال والصناديق والعفش اللي فيه أماكن تخزين.

في الآخر، السر مش في الهوس بالتنظيف، لكن في الاختيارات الصح. شوية تغييرات بسيطة في الديكور والتنظيم ممكن تنقل شكل البيت في حتة تانية خالص من غير مجهود جبار.

يا ترى مين فينا عنده «كرسي الهدوم» اللي مبيفضاش أبداً؟